samedi 18 décembre 2010

يزي ما بكينا! هات الحلول عيشك

كي العادة و بما انو الكلام احسن وسيلة للتعبير (سيرتو الي لكتيبة عالكالفيي ڢيرتوال تمرج ) قررت بش نعبر بالكلام
ما عليك كان تنزل على بلاي و تسمع
tilidom file storage

vendredi 17 décembre 2010

المعارضة في تونس... وقتاش تفيقو؟؟

كي العادة ما عادش بش نكتب آما بش نتكلم
ما عليك كان تنزل على بلاي و تسمع
tilidom file storage

المرة هذي مانيش بش نكتب آما بش نتكلم

المرة هذي بش نتكلم و يزي ما كتبت
ماعليك كان تنزل على بلاي بش تسمع



tilidom file storage

jeudi 16 décembre 2010

الحمد لله المشاكل الكل وفات مالبلاد. و تونس ولات بالرسمي بلد الفرح الدائم

اي نعم نقولها و نعاودها مرارا و تكرارا و الي مش مصدقني ماعليه كان يتفرج فالفيديو هذا




ايا سيدي مجلس المستشارين وصل يخمم في صوت الآذان كيفاش ينجم يقلق الطلبة في قرايتهم!
معنتها ديجا الطلبة هذوما مستقبلهم مضمون و هذاكا علاش يلزم نوفرولهم جميع سبل الراحة بش تقعد جامعاتنا في الصفوف الاولى في مجال التعليم العالي في العالم (مباشرة بعد اثيوبيا و النيجر و مدغشقر)
معنتها الي تونس اومورها تعمل الكيف و ماعندنا حتى عجز في الميزان التجاري متاعنا مثلا
معنتها الي التعليم متاعنا تتمنى اعرق الدول في العالم بش توصلو
معنتها الي الشباب متاعنا و في السنة الدولية للشباب تحسو في قمة الفرحة و السعادة و بيانسير الشباب الي يحرق كل يوم ماهو الا شباب تافه و متخلف ذهنيا
معنتها الي الحرية وصلت عندنا لدرجة ما يتصورهاش العقل آما الله غالب امريكا هي الي ما تحبش و هذاكا علاش هيا الي تقص علينا في الانترنات و تحطلنا في ال404
معنتها تالمون المواطن عايش في خير لدرجة انو ماعاش عندنا فقر في تونس و حتى الفيديو يلي تحط في فايس بوك على المرا الي عايشة هي و صغارها في كهف ماهو الا فيلم عملتو المعارضة لتشويه سمعة تونس الناصعة البياض و الاستقواء بالاجنبي لتمرير اجندات مشبوهة من مرتزقة السياسة و محترفي البهلوانيات الرخيصة (الرجاء مراجعة مقالات علي بن نصيب في جريدة الضريح).
معنتها و معنتها و معنتها.....
معنتها الي احنا مشاكلنا لكلها و فات و مقعدلنا كان صوت الآذان الي يقلق في الوليدات مساكن و ميخليهمش يقراو على رواحهم
آآآآه يا تونس....
ايا نخليكم

شبيك تحكي على حرية التعبير؟ حلال عليك حرام عليا؟

فما حاجة مافهمتهاش و ابارامون مانيش بش نفهمها: علاش هوما بيدهم لعباد الي يساندو في سوسن معالج والي نهار كامل يحكيو على حرية التعبير هوما بيدهم لعباد الي جاو ضد مغني الراب بسيكوأم و فرحو كي الباج فان متاعو في فايسبوك تصنصرت؟
ياخي حرية التعبير حلال عليك حرام عليه؟
بش نوضح حاجة قبل كل شي بش حتى واحد ما يبدى يهز و ينفض: نتفق في حاجات مع هذا و مع هذا و في نفس الوقت ما نتفقش في حاجات مع هذا و مع هذا. بالمفيد المختصر لاني فان متع سوسن معالج و لاني فان متع بسيكوام معنتها بالعربي نوتر. و الوحيد الي يغني راب بالعربي و نسمعو و مانفدش منو هو دوبل كانون و الباقي بالنسبة ليا آنا شكارة و البحر كيف كيف بالنسبة للمثلين التوانسة تو سامبلومون خاطر التلفزة التونسية (بما فيها تونس7 حنبعل و نسمة) شطبت عليها عندي بارشا و حتى ممثل ما يعجبني خاطر ما نتفرجش فيهم من اصلو.
ايا سيدي نرجعو لموضوعنا: الپرينسيب متاع حرية التعبير ولا الحرية بصفة عامة هو قول شتحب و خمم كيما تحب المهم ما تتعدى على حد. مانيش نعطي في دروس ولا غيرو خاطرني مانيش مؤهل بش نعطي دروس اما الي نحب نقولو قلتو وكهو.

ايا نخليكم

mercredi 15 décembre 2010

كلنا ضد فلانة

كلنا ضد سوسن معالج...
بجاه ربي فهموني ياخي هالعباد الي تخمم هكا كيفاش تخمم بالظبط؟؟ ولا باش تخمم؟؟ (بون نعرف الي فما نسبة كبيرة متاع احتمال انهم يخممو بالمؤخرة متاعهم).
و هذا الكل علاش؟ خاطرها صوروها و هي تشرب؟ و انتي آش مدخل دين والديك فيها؟
آش يهمك؟ ياخي بش تحاسب معاها؟ تخلصلها فالشراب متاعها؟
لوقتاش بش تقعد تلخص فالدين متاعك في مع
ا ضد فلان و معا ضد فلتان؟ يا ولدي الوقت الي تضيع فيه عالفايسبوك و انتي تسب في فلان و فلتان ماتنجمش تعمل بيه حاجة تصلح؟ برا حل كتاب حل جريدة يا سيدي حل بلوڨ و عبر و قول شنوا تحب تقول! اما حاجة وحدة: دع الخلق للخالق!!
ايا نخليكم

هاني حليتو البلوڨ باهي؟

ايا سيدي على سلامتكم و مرحبا بيكم في بلوڨي الجديد
لحكاية عندها مدة و انا زادة عندي مدة نخمم اما برجولية كي كثر العوج (بون هو العوج عندو مدة ام كي انا ما عادش انجم) قررت بش نحل بلوڨ و نعبر و ما فما حد خير من حد.
الحكاية الصعيبة هي الخطوة الاولى و انا حمدولا هاني عملتها
نشالله برك ماطيرش النفحة و واحد يكمل يكتب و يعبر
مرحبا بيكم مرة اخرى